Micheal's blog

Le corradh agus 100 bliain anuas, is iomaí údar Conallach a d’fhág saothar thar a bheith saibhir agus luachmhar againn mar oidhreacht. Déanann Taisclann.ie iarracht cuid den oidhreacht shaibhir sin a chur os comhair an tsaoil arís trína gcuid oibre caomhnaithe agus digitithe. Inniu agus Lá Idirnáisiúnta na Leabhar buailte linn, tugann muid cuireadh don phobal bualadh isteach chuig https://taisclann.ie/ agus blaiseadh beag a fháil den bhailiúchán leabhar atá ar fáil ansin.

Rinneadh an leabhar Scoil na gCruach (1907-1971) a sheoladh go hoifigiúil i mí Feabhra 2008. Is éard atá sa leabhar seo ná stair Scoil na gCruach atá suite i nGaeltacht Láir Thír Chonaill, scoil a bunaíodh sa bhliain 1907 agus a druideadh in 1971.

Tá mórán eolais agus seanchais sa leabhar seo fosta ar cheantar na gCruach i gcoitinne mar aon le cuimhní cinn iardhaltaí scoile agus scoláirí Gaeilge a thugann léargas ar an dóigh a ndeachaigh an fhíorGhaeltacht seo i bhfeidhm orthu féin. 

Tá tionscadal cartlainne ar siúl san am i láthair ag Acadamh na hOllscolaíochta Gaeilge i nGaoth Dobhair a bhfuil sé d’aidhm aige ábhar foilsithe agus neamhfhoilsithe a bhaineann le Gaeltacht Dhún na nGall ach go háirithe a dhigitiú, a rangú agus a chur ar fáil go héasca don phobal.